Ytterst på Grotle på Bremangerlandet ligg ei av dei vakraste sandstrendene i Noreg – Grotlesanden. Med silkemjuk, kvit sand og ope hav så langt auget rekk, er dette ei ekte naturperle og eit populært reisemål for både lokalbefolkning og tilreisande.
Langs den vesle «rivieraen» frå Hauge og heilt ut til Grotle finn du fleire små og store strender, men Grotlesanden er den største – og for mange også den flottaste. Her møter dramatisk kystnatur det mjuke strandlandskapet, og kontrastane gjer staden heilt unik.
På Grotlesanden finn du toalett- og dusjanlegg som gjer strandbesøket ekstra komfortabelt.
Det er betalt parkering, med pris på 50 kroner per dag.
Næraste tilbod for overnatting, gjestehamn, kafé, restaurant og daglegvarebutikk finn du ved Iglandsvik Marina, om lag 2 kilometer frå stranda. Her er det òg mogleg å telte på tilrettelagde område.
Grotlesanden er startpunktet for den populære fjellturen til Veten – Noregs vestlegaste fjellplatå. Turen byr på spektakulær utsikt heile vegen, og særleg tilbake mot sandstranda og bygda Grotle. Dette er ein flott kombinasjon av strandliv og fjelloppleving på same dag.
Enten du kjem for ein roleg dag på standa, ein frisk dukkert i havet, fotografering i magisk lys – eller som start på fjelltur – er Grotlesanden ein stad som set spor. Ta vare på naturen, vis omsyn og nyt ei av Vestlandet sine mest ikoniske strender.
Källa: Nordfjord