Lærdalstunnelen - verdas lengste vegtunnel

Fakta om Lærdalstunnelen

Lengd: 24,5 km

Byggjeperiode: 1995–2000

Opning: November 2000

Plassering: Mellom Aurland og Lærdal, om lag 8 km frå Flåm og 2 km frå Aurlandsvangen

Tilkomst: Bil og buss

Bompengefri: Ja

Lærdalstunnelen er verdas lengste vegtunnel og strekkjer seg 24,5 kilometer gjennom fjellet mellom Aurland og Lærdal. Tunnelen opna i november 2000 og har fleire tryggingstiltak, mellom anna overvaking, havarinisjer og snunisjer. Kvar sjette kilometer finn du opplyste fjellhallar med spesiell lyssetjing som gir sjåførane eit avbrekk frå den lange tunnelen.

Viktig informasjon om oppgradering av Lærdalstunnelen

Frå 16. november 2026 startar ei omfattande oppgradering av Lærdalstunnelen. Trafikantane må førebu seg på nattestengingar på opptil 12 timar og planleggje reisa si deretter. Tidspunkta for stenging blir handheva strengt, og det vil ikkje vere mogleg å køyre inn i tunnelen etter at nattestenginga har teke til.

For fastbuande i Aurland og Lærdal blir det sett opp eit busstilbod med tre kveldsavgangar frå kvar side av tunnelen før midnatt. Ved akutte situasjonar der liv og helse står på spel, skal det dessutan vere mogleg å få fram utrykkingskøyretøy gjennom tunnelen på kort varsel.

Natt til søndag er tunnelen open for trafikk. På dagtid kan entreprenøren utføre arbeid som ikkje krev full stenging. Tunnelen vil då vere open, men trafikken kan bli regulert til eitt køyrefelt på korte strekningar med lysregulering.

Lærdalstunnelen er ei viktig transportåre mellom aust og vest. Dersom Hardangervidda blir stengd på grunn av uvêr om vinteren, er det planlagt at Lærdalstunnelen skal haldast open. Entreprenøren må tilpasse arbeidet til dette kravet.

Planlegg reisa di: Sjekk oppdaterte meldingar om stengingstider og trafikkforhold før du legg ut på tur. Ta høgd for ekstra reisetid, og vurder alternative reiseruter dersom det er nødvendig. Les meir her

Opplev ei rundreise med store kontrastar

Ei rundreise gjennom Indre Sogn byr på store kontrastar mellom fjord, fjell og historiske attraksjonar. Køyr gjennom Lærdalstunnelen til Flåm, der du kan ta ein pause ved fjorden, før du returnerer over det spektakulære Aurlandsfjellet langs den nasjonale turistvegen, også kjend som Snøvegen, mellom Aurlandsvangen og Lærdalsøyri.

På denne rundturen får du oppleve fjellet både frå innsida og utsida, med dramatiske fjellandskap og storslått utsikt undervegs.

Har du tid, er det vel verdt å leggje turen innom Borgund stavkyrkje i Lærdal. Den rundt 800 år gamle stavkyrkja er eit av dei mest kjende kulturminna i Noreg. Ved kyrkja finn du eit besøkssenter med utstillingar om den norske stavkyrkjearven, i tillegg til kafé og butikk. Kyrkja og besøkssenteret har sesongopning, vanlegvis frå mai til september.

Praktisk tips: Lærdalstunnelen er gratis å køyre gjennom, medan Aurlandsfjellet byr på ei heilt anna reiseoppleving med utsiktspunkt og høgfjellsnatur. Ver merksam på at fjellvegen er vinterstengd delar av året.